വചനവും ദൈവവും.

ആദിയിൽ വചനം ഉണ്ടായിരുന്നു;വചനം ദൈവത്തോട് കൂടെ ആയിരുന്നു; വചനം ദൈവമായിരുന്നു. (യോഹന്നാൻ 1:1)
In the beginning was the Word, and the Word was with God, and the Word was God (John 1:1)

ഈ വാക്യത്തിനെ കുറിച്ചാണു നാം ഇന്ന് ചർച്ച ചെയ്യുന്നത്.

(1)ആദിയിൽ വചനം ഉണ്ടായിരുന്നു; അതായത് വചനം ആദി മുതൽക്കേ ഉണ്ടായിരുന്നു.
(2)വചനം ദൈവത്തോട് കൂടെ ആയിരുന്നു; വചനം എന്ന് പറയുന്നത് എന്തോ അത് ദൈവത്തിന്റെ കൂടെ തന്നെ ഉണ്ടായിരുന്നു.
(3)വചനം ദൈവമായിരുന്നു; വചനം ദൈവമായിരുന്നു എന്ന് വായിക്കുമ്പോൾ ചിലർ മനസ്സിലാക്കുന്നത് വചനവും (2) ൽ പറഞ്ഞ ദൈവവും ഒന്നായിരുന്നു എന്നാണു.

അതായത് വചനം എന്നാൽ ജഡമായി തീർന്ന യേശുക്രിസ്തുവാണു എന്ന് നമ്മുക്കറിയാം (യോഹന്നാൻ 1:14). എന്നാല്‍ യേശുകൃസ്തുവും ദൈവവും ഒരാൾ ആണു എന്നാണു ഈ വചനത്തിലൂടെ പലരും തെറ്റായി ഗ്രഹിക്കുന്നത്.

വചനം ദൈവത്തോട് കൂടെയായിരുന്നു എന്നതിലെ ദൈവം ആരായിരുന്നു എന്ന് മനസിലാക്കിയാല്‍ വചനവും ദൈവവും തമ്മിലുള്ള വ്യത്യാസം പിടികിട്ടും. ഇത് വി.വേദപുസ്തകത്തിൽ വ്യക്തമാക്കിയിട്ടുണ്ട്. ദൈവം അത്യുന്നതനും സർവ്വശക്തനുമാണു.(സങ്കീർത്തനം 91:1) ഇംഗ്ലീഷിൽ Most High & Almighty എന്നാണു പറഞ്ഞിരിക്കുന്നത്.

ഈ അത്യുന്നതനും സർവ്വശക്തനുമായവനിൽ നിന്നത്രേ യേശുകൃസ്തു ജനിച്ചത്.
അവൻ ഏകജാതനാണു, ആദ്യ ജാതനുമാണു (സങ്കീ 89:27, കൊ.ലോ 1:15, 1 യോഹന്നാൻ 5:1)
മേല്പറഞ്ഞ വചനങ്ങളുടെ വെളിച്ചത്തിൽ സർവ്വശക്തനായ ദൈവത്താൽ ജനിപ്പിച്ചവനത്രെ വചനം എന്ന ജഡമായി തീർന്ന യേശുകൃസ്തു എന്നു മനസ്സിലാക്കാം.

സർവ്വശക്തനായ ദൈവം അനാദിയും ശാശ്വതമായവനുമാകുന്നു.(സങ്കീ 90:2).ദൈവത്തിന്റെ ആരംഭവും അവസാനവും എന്താണു എന്ന് കേവലം കൃമിപ്രായനായ മനുഷ്യൻ അറിയേണ്ട ആവശ്യമില്ല(ആവർത്ത 29:28) എന്ന് വി.വേദപുസ്തകത്തിൽ പറഞ്ഞിട്ടുണ്ട്.

ഇതിൽ നിന്നുമെല്ലാം യോഹന്നാന്റെ സുവിശേഷം ഒന്നാം അധ്യായത്തിലെ ഒന്നാം വാക്യത്തിലെ ദൈവം എന്നത് വചനം എന്ന യേശുകൃസ്തുവിനെയല്ല. അത്യുന്നതനും സർവ്വശക്തനുമായ (Almighty) ദൈവത്തെയാണു എന്ന് നമ്മുക്ക് മനസ്സിലാക്കാം.

അങ്ങിനെ വചനവും ദൈവവും രണ്ടാണെങ്കിൽ യോഹന്നാൻ 1:1 ന്റെ അവസാനം എന്ത് കൊണ്ട് വചനം ദൈവമായിരുന്നു എന്ന് പറഞ്ഞിരിക്കുന്നത് എന്ന് സംശയം തോന്നാം. വചനം ദൈവമായിരുന്നെങ്കിൽ ആദ്യം പറഞ്ഞ അത്യുന്നതനും സർവ്വശക്തനുമായ ദൈവം തന്നേയല്ലേ വചനം എന്ന സ്വഭാവികമായ ചോദ്യം ഉയർന്നു വരാം. അതിന്റെ വ്യക്തതയ്ക്ക് വേണ്ടി ഇനി നമുക്ക് നമ്മുടെ രക്ഷിതാവും കർത്താവുമായ യേശു കൃസ്തുവിനെ സംബന്ധിച്ച കാര്യം ചിന്തിക്കാം.

യേശു ഈ ഭൂമിയിലേക്ക് പൂർണ്ണ മനുഷ്യനായി വരുന്നതിനു നൂറ്റാണ്ടുകൾക്ക് മുൻപ് പ്രവാചകനായ യെശയ്യാവ് പറഞ്ഞത് ഇപ്രകാരമായിരുന്നു. "നമുക്ക് ഒരു ശിശു ജനിച്ചിരിക്കുന്നു; നമുക്ക് ഒരു മകൻ നൽകപ്പെട്ടിരിക്കുന്നു; ആധിപത്യം അവന്റെ തോളിൽ ഇരിക്കും; അവനു അത്ഭുത മന്ത്രി, വീരനാം ദൈവം, നിത്യ പിതാവ്, സമാധാന പ്രഭു എന്ന് പേർ വിളിക്കപ്പെടും. (യെശയ്യാവ് 9:6 )കന്യക ഗർഭിണിയായി പ്രസവിച്ച ഇമ്മാനുവേൽ എന്ന് പേർ വിളിക്കപ്പെട്ട (യെശയ്യാവ് 7:14) യേശുവിനെ കുറിച്ചാണു ഈ വാക്യത്തിൽ പറഞ്ഞിരിക്കുന്നത്. ഇവിടെ യേശുവിനെ വിശേഷിപ്പിച്ചിരിക്കുന്നത് വീരനാം ദൈവം എന്നാണു. ഇംഗ്ലീഷിൽ അത് Mighty God എന്നാകുന്നു.

ഇപ്പോൾ ദൈവത്തെ പറ്റിയും വചനത്തെ പറ്റിയും പറഞ്ഞിരിക്കുന്നത് എന്താണു എന്ന് മനസ്സിലായി കഴിഞ്ഞു. ഇത് ഇനി യോഹന്നാൻ 1ൽ 1 എങ്ങനെയാണെന്നു നോക്കാം.
"ആദിയിൽ വചനം ഉണ്ടായിരുന്നു.
വചനം അത്യുന്നതനും സർവ്വശക്തനുമായ ദൈവത്തോട് കൂടെയായിരുന്നു.
വചനം വീരനാം ദൈവമായിരുന്നു."

ഇതിന്റെ പരിഭാഷ ഇംഗ്ലീഷിൽ പറയുകയാണെങ്കിൽ

"In the beginning was the Word and the Word was with Almighty and Most high GOD, and the Word was Mighty god"

ഈ സർവ്വശക്തനായ ദൈവം തന്റെ സൃഷ്ടിപ്പിൻ ആരംഭമായി തന്റെ ആദ്യ ജാതനും ഏകജാതനുമായ വചനത്തെ (അതായത് യേശുകൃസ്തുവിനെ) ജനിപ്പിച്ചു. പിന്നീടുള്ള ദൈവസൃഷ്ടിപ്പുകളെല്ലാം തന്നെ തന്റെ ആദ്യ ജാതനും ഏകജാതനുമായ വചനം അഥവ യേശുവും കൂടിയായിരുന്നു. എന്നു പറഞ്ഞാൽ എന്തു സൃഷ്ടിക്കണം എന്ന് ദൈവം വിചാരിക്കുന്നുവോ അതെല്ലാം ദൈവ നിർദ്ദേശമനുസരിച്ച് സൃഷ്ടിച്ചത് യേശുവായിരുന്നു(സദൃശ്യവാക്യം 8:22-31, കൊലോസ്യർ 1:15-20) ആദാമിന്റെ സൃഷ്ടിപ്പിലും യേശു ആയിരുന്നു പ്രധാന ശില്പി. (ഉല്പത്തി 1:26) എന്റെ പിതാവ് എന്നേക്കാൽ വലിയവനാണു എന്നു യേശുകൃസ്തു തന്നെ പറഞ്ഞിട്ടുണ്ട്. (യോഹന്നാൻ 14:28)

ഇതിൽ നിന്നും മനസ്സിലാക്കാൻ കഴിയുന്നത് എന്താണു.

സർവ്വ ശക്തനും അത്യുന്നതനും ആയ ദൈവത്തോട് കൂടെ ശക്തനായ ദൈവവും ഉണ്ടായിരുന്നു എന്നാണല്ലോ. അപ്പോൾ ഇവിടെ പരാമർശിക്കുന്നത് രണ്ട് വ്യക്തികളെയാണു. ഒരാളെയല്ല. രണ്ടും തമ്മിൽ അജഗജാന്തര വ്യത്യാസമുണ്ട്. രണ്ടും ഒന്നല്ല രണ്ടും വെവ്വേറെ തന്നെയാണല്ലോ. അത്യുന്നതനായ ദൈവത്തോട് ഉപമിക്കാനോ സാദൃശ്യപ്പെടുത്താനോ ആയ ഒന്നും തന്നെയില്ല എന്നാണു പരിശുദ്ധ വേദപുസ്തകത്തിൽ പ്രസ്ഥാവിച്ചിരിക്കുന്നത്. (സങ്കീ: 86:8, 89:6,95:3, യശയ്യ 40:18,25, 40:5)

ഇനിയും നമുക്ക് ചിന്തിക്കാനുള്ളത് വചനത്തെ എന്തു കൊണ്ട് ദൈവം എന്ന് വിശേഷിപ്പിച്ചിരിക്കുന്നു എന്നതാണു. വി. വേദപുസ്തകത്തിൽ ദൈവം എന്നു പല ഭാഗങ്ങളിലും ഉപയോഗിച്ചിട്ടുണ്ട്. എന്നാൽ അതെല്ലാം അത്യുന്നതനായ ദൈവത്തെ പറ്റിയല്ല.ഉദാ: പുറപ്പാട് 4 ൽ 16, ഫിലിപ്യർ 3 ൽ 19 സങ്കീർത്തനം 82 ൽ 1, യോഹന്നാൻ 10:34 എന്നീ വാക്യങ്ങൾ വായിച്ചാൽ നമ്മുക്ക് മനസ്സിലാക്കാൻ സാധിക്കുന്നത് ദൈവം തിരഞ്ഞെടുക്കുന്ന ഓരോ വ്യക്തിയും ആവശ്യമായ സന്ദർഭങ്ങളിൽ ദൈവത്തിന്റെ പ്രതിനിധികളായി ദൈവത്തിന്റെ പരിശുദ്ധാത്മ ശക്തിയാൽ ഉദ്യമിപ്പിക്കപ്പെട്ട് ജനത്തോട് സംസാരിച്ചവരും അവരെ ദേവന്മാർ അഥവ ദൈവങ്ങൾ എന്നു വിളിക്കപ്പെട്ടവരുമാണു. എന്നാൽ അവരൊന്നും ദൈവമല്ല എന്ന് നമുക്ക് അറിയാമല്ലോ.

അതു കൊണ്ട് തന്നെയാണു ദൈവത്തിന്റെ നിശ്ചയപ്രകാരമുണ്ടായ വചനത്തെയും ദൈവം എന്ന് വിളിച്ചത്.

ഉപസംഹാരത്തിൽ മനസ്സിലാക്കേണ്ട കാര്യം.

1) ആകാശത്തിലോ ഭൂമിയിലോ ദേവന്മാർ എന്നു പേരുള്ളവർ ഉണ്ടെന്നു വരികിലും പിതാവായ ഏകദൈവമേ നമുക്കുള്ളു.
2) യേശു കൃസ്തു എന്ന ഏക കർത്താവും നമുക്കുണ്ട്.
(1 കൊരിന്ത്യർ 8:5)

ഇങ്ങനെ പൗലോസ് അപ്പോസ്തോലൻ പ്രസ്താവിച്ചതിന്റെ അടിസ്ഥാന കാരണം അറിയാൻ നമുക്ക് യോഹന്നാൻ 17 ന്റെ 3 വാക്യം ശ്രദ്ധിക്കാം.

1) ഏകസത്യ ദൈവത്തെ അറിയുക.
2) അവൻ അയച്ച യേശുകൃസ്തുവിനെ അറിയുക.

അറിയുക എന്നാൽ അവന്റെ കല്പനകളെ പ്രമാണിക്കുക എന്നാണു അർത്ഥം. (1 യോഹന്നാൻ 2:3)

ഇങ്ങനെ നാം അറിഞ്ഞു കഴിയുമ്പോൾ യേശു നമുക്ക് പരിശുദ്ധാത്മ ശക്തിയെ തന്റെ പിതാവാം ദൈവത്തോട് അഭ്യർത്ഥിച്ച് താൻ വാഗ്ദത്തം ചെയ്തതിനെ നമ്മുടെ മേൽ അയക്കും (ലൂക്കോസ് 24:49

ഈ ശക്തി നമുക്ക് ലഭിക്കുമ്പോൾ നാം യേശുവിന്റെ യഥാർത്ഥ സാക്ഷികൾ ആകും (അപ്പൊ 1:8 )
അതോടൊപ്പം യേശു ഉദ്ദേശിച്ച തരത്തിൽ നമുക്ക് എത്തിപ്പിടിക്കാവുന്ന ദൂരം വരെ അവന്റെ സാക്ഷ്യം മറ്റുള്ളവരോട് അറിയിക്കുകയും ചെയ്ത് നമ്മുടെ ജീവിതയാത്ര അവസാനിപ്പിക്കാൻ ദൈവം സഹായിക്കട്ടെ എന്നു പ്രാർത്ഥിക്കാം.

"യേശുവിന്റെ വാഗ്ദത്ത പ്രകാരം നമുക്ക് അയക്കപ്പെടുന്ന പരിശുദ്ധാത്മ ശക്തി" എന്നത് എന്ത് എന്നതിനെ പറ്റിയുള്ള ചിന്ത വരും പോസ്റ്റുകളിൽ നടത്താം.